O vindeiro venres 12 de decembro, en horario de 10:00 a 14:30 h, celebrarase a Xornada sobre Biodiversidade Agrogandeira, organizada polo Centro de Investigacións Agrarias de Mabegondo (AGACAL – CIAM) e o Grupo Naturalista Hábitat. Esta iniciativa nace co obxectivo de compartir coñecemento científico arredor do papel esencial que xoga a biodiversidade nos sistemas agrarios e gandeiros galegos, así como poñer en valor prácticas que favorecen a sustentabilidade e a conservación do territorio.

Ao longo da mañá trataranse diversas temáticas vinculadas á biodiversidade do medio agrario: o papel das granxas leiteiras como refuxio de aves (SEO/BirdLife Cantabria), os avances nos traballos de anelamento do CIAM (Grupo de anelamento Phylloscopus), a importancia das sebes tradicionais na paisaxe rural e o uso da flora indicadora para avaliar a calidade dos prados de sega. Tamén se abordará o valor dos anélidos como bioindicadores da saúde do solo e presentarase o Indicador de Bolboretas de Pradeiras (GBI) (SOCEME), fundamental para coñecer as tendencias das poboacións de bolboretas europeas.

A xornada será de balde e aberta ao público, dirixida tanto a profesionais do sector primario como a estudantes, técnicos, entidades ambientais e calquera persoa interesada en coñecer máis sobre a relación entre biodiversidade e actividade agrogandeira. Para participar é imprescindible realizar unha inscrición previa a través do seguinte formulario:

Unha vez realizada a inscrición, o G. N. Hábitat confirmará as prazas por correo electrónico, empregando o enderezo facilitado pola persoa interesada. Na mensaxe de confirmación incluiranse, se procede, as ligazóns ás salas de videoconferencia que permitirán seguir os relatorios de maneira telemática.

Solicítase responsabilidade e compromiso coa asistencia. No caso de que finalmente non poidas participar unha vez confirmada a túa praza, agradeceremos que o comuniques canto antes, facilitando así que outra persoa poida ocupar o teu lugar e aproveitar a actividade.

Dúbidas e comentarios en inscricion@gnhabitat.org│981 135 014

Anímate a participar e acompáñanos nesta xornada dedicada ao coñecemento, á conservación e ao futuro do noso territorio agrogandeiro!