Por oitavo ano consecutivo o Concello de Carballo lanza o programa Eu ❤️ Razo Baldaio, para continuar co obxectivo de crear hábitos de turismo consciente na contorna litoral, fomentar a participación cidadá e acadar a valorización deste espazo natural protexido, continuando co espírito de que canto máis se coñeza máis se respecte. Neste sentido o Concello, da man das organizacións implicadas, levaremos a cabo diversas xornadas divulgativas e de voluntariado ambiental, ao longo dos meses de xullo, agosto e setembro do 2026. Un trimestre cheo de actividades nun fermoso marco natural, mais con grupos restrinxidos para achegarse á contorna con sentidiño. 

As accións serán abertas ao público e de balde, e a maioría delas requirián preinscrición e terán as prazas limitadas. Sendo así, para a participación nestas xornadas será imprescindible que os interesados fagan cadansúas solicitudes de praza a través dos formularios online habilitados.

Toda a información detallada do programa, calendario de actividades e vías de inscrición nas actividades, están dispoñibles na web oficial habilitada polo Concello de Carballo…Non deixes de visitala!

O G.N.Hábitat será o encargado de levar a cabo 6 actividades, coas que forneceremos novamente o coñecemento sobre a biodiversidade vencellada a este espazo:

Xullo

• Domingo día 12, de 11:00 a 13:00h ➡️ Mamíferos mariños e simulacro de asistencia a varamentos.
• Mércores día 22, de 22:00 a 01:00h ➡️ A noite das avelaíñas.
• Mércores día 29, de 10:30 a 13:30h ➡️ Fauna e flora das contornas dunares.

Agosto

• Domingo día 16, de 11:00 a 13:30h ➡️ Iniciación á ilustración de natureza.
• Domingo día 30, de 11:00 a 13:30h ➡️ Iniciación á fotografía de natureza.

Setembro

• Mércores día 2, de 10:30 a 13:30h ➡️ Iniciación á ornitoloxía.

Visita a web do proxecto, anótate nas actividades que desexes e…vémonos no campo!

Enche o teu verán de natureza!