Escola de Naturalistas
Gustaríache ser como eles?
Ornitoloxía
Herpetoloxía
Botánica
Entomoloxía
Fotografía
Mastozooloxía...
• Sesións impartidas por experimentados naturalistas
• Xornadas teóricas
• Saídas ó campo...
E moitos bos momentos!
Aínda o estás
pensando?
NaturAlístate!
A Escola de Naturalistas é unha actividade realizada polo Grupo Naturalista Hábitat dende o ano 2009, única no ámbito da formación ambiental en Galicia, que consiste en aprender a escoitar, ver e identificar os elementos que compoñen a biodiversidade galega.
A través de diversas actividades tratamos de afondar, de xeito teórico-práctico, no estudo das diferentes áreas do naturalismo (botánica, zooloxía, etc.). Cada unha das actividades está dedicada a un tema, primeiro cunha charla teórica que se imparte no noso local (rúa Camariñas nº8 baixo, na Coruña) e logo cunha saída de campo centrada na contorna do espazo natural protexido do encoro de Abegondo-Cecebre, área dunha notable diversidade biolóxica que motivou a súa declaración como LIC, Lugar de Interese Comunitaria ES1110004 (hoxe día ZEC, Zona Especial de Conservación) na Red Natura 2000, e incluído como zona núcleo da Reserva de Biosfera Mariñas Coruñesas e Terras do Mandeo, debendo ser o obxectivo principal nesta área a súa conservación.
Os participantes na Escola de Naturalistas adquirirán a condición de membros do Grupo Naturalista Hábitat durante un ano, tendo dereito a participar de forma gratuíta en todas as demais actividades organizadas polo grupo, así como a recibir o material editado neste período. Unha vez rematado o curso entregarase un certificado acreditativo de participación co número de horas teórico-prácticas recibidas.
¡Se tes curiosidade pola natureza e ganas de aprender un pouco máis sobre ela, esta é a túa oportunidade!
Se estás interesado en formar parte da próxima promoción da Escola de Naturalistas, segue de preto as nosas noticias ou contacta connosco.
Temario habitual da Escola de Naturalistas
- Introdución ao naturalismo
- Introdución á herpetoloxía
- Anelamento científico de aves
- Introdución á ornitoloxía
- Introdución á mastozooloxía
- Introdución á botánica
- Introdución á odonatoloxía: as libeliñas e donceliñas galegas
- Introdución á entomoloxía
- Iniciación á fotografía da natureza
- Actividade de fin de curso: mesa redonda e bioblitz
Cada charla e actividade de campo terá unha duración aproximada de 2 e 4 horas, respectivamente. Así, o curso terá unhas 20 horas teóricas e 44 horas prácticas.
Os formadores participantes nestas actividades son naturalistas de ampla experiencia en cada unha das diferentes áreas tratadas no curso.
As datas das actividades confirmaranse a medida que avance o ano, pero as charlas serán preferiblemente os xoves ou venres a partir das 20:30 h cunha duración aproximada de 2 horas, e as saídas de campo terán lugar en fins de semana cunha duración de 3-4 horas.
O temario e datas estarán suxeitas a modificacións en función da dispoñibilidade dos poñentes e das condicións meteorolóxicas.
Coa colaboración de:
