Chegamos á 12ª convocatoria, o Grupo Naturalista Hábitat, da man da Cátedra Emalcsa da Universidade de A Coruña e a Reserva de Biosfera Mariñas Coruñesas e Terras do Mandeo, comprácese en organizar o XII CERTAME DE DEBUXO DA NATUREZA “Vida silvestre do encoro de Cecebre”.

Comezamos un novo ciclo de Certames de Debuxo centrándonos nas especies que podemos ver no Encoro de Abegondo-Cecebre nas diferentes estacións do ano. Este XII Certame comeza co “Inverno no Encoro”. O inverno é unha época de calma e tranquilidade, marcada polo frío e a espera de tempos mellores. Moitos insectos agóchanse para pasar os meses fríos, mentres que outros prosperan alimentándose e medrando. As árbores caducifolias perden as súas follas, deixando á vista liques que indican a calidade do aire. Moitas aves migran a zonas máis cálidas, mentres outras chegan ao encoro de Abegondo-Cecebre para invernar. Os morcegos buscan refuxio en covas ou árbores vellas. Mamíferos carnívoros buscan alimento, aproveitando os cambios estacionais. Os anfibios comezan a súa época de cría baixo as chuvias invernais. A medida que os días se alongan, plantas como os narcisos e as violetas bravas anuncian a chegada da primavera.

Coa posta en marcha desta iniciativa preténdese implicar á xente no contacto coa súa contorna, a través do debuxo da flora, fauna e xea presente no espazo natural protexido do encoro de Cecebre [integrado na Reserva de Biosfera Mariñas Coruñesas e Terras do Mandeo] e as cuncas dos ríos Mero e Barcés, co gallo de consolidar na cidadanía unha corrente de interese polo coñecemento e preocupación pola conservación do Patrimonio Natural.

A inscrición é de balde e aberta á cidadanía, non sendo preciso ter aptitudes nin coñecementos en ilustración para poder participar, tan só as ganas de gozar da natureza a través do debuxo.

Haberá dúas categorías diferentes (menores e maiores de 14 anos) e premios en todas elas para as obras máis salientables. Así mesmo, de entre as obras achegadas seleccionaranse aquelas que pasarán a ilustrar o Calendario 2025 da nosa entidade.

O prazo de peche de inscricións e entrega dos debuxos rematará o 04 de outubro de 2024.

Toda persoa que desexe participar deberá ler e cumprir o recollido no documento das Bases Reguladoras (dende as cales se da acceso ao formulario de inscrición online), dispoñibles na seguinte ligazón:

Así mesmo, podes descargar o cartel do XII certame de debuxo na seguinte ligazón, e animar a compañeiros e amigos a participar!

Anímate, difúndeo e axúdanos a superarnos este ano!!

* Se queres atopar máis información, imaxes e vídeos de anteriores convocatorias desta iniciativa, visita a seguinte ligazón: novas do certame na nosa web.

Dúbidas e comentarios en inscricion@gnhabitat.org│981 135 014

Promove:                                          Colabora: