Continuamos ca VI promoción de Escola de Naturalistas. Este quinto bloque estará adicado á entomoloxía, coa charla “Introdución á entomoloxía” e a súa correspondente saída de campo. Afondaremos neste extenso á par que abraiante mundo dos invertebrados terrestres, coñeceremos as diferentes técnicas de estudo, ademais de consellos e experiencias útiles para os que se queiran iniciar neste apaixonante mundo.

Este bloque de contidos virá impartido por dous compañeiros do G.N.Hábitat:

Jorge A. Ramos, Licenciado en Bioloxía Animal pola Universidade de Santiago, relator en diferentes Xornadas e Congresos Ibéricos de Entomología, ademáis do Congreso Internacional de Coleopteroloxía celebrado en Barcelona en 1989. Ten publicado un libro de texto de Bioloxía e numerosos artigos entomolóxicos. Do seu labor investigador recente destacamos o proxecto Transgalaica, a súa intervención no descubrimento da larva de Cychrus spinicollis e a redescripción da larva de Eucarabus deyrollei.

Elia Pérez, Vogal de Entomoloxía do G.N. Hábitat e Licenciada en Bioloxía pola Universidade de A Coruña, Máster en biodiversidade pola Universidad Autónoma de Madrid centrado na Lepidopteroloxía. Ten participado en diferentes xornadas e congresos, entre os que destaca o Congreso Español de Entomoloxía do ano 2015, no cal expuso o seu estudo “Influencia de las carreteras A-4 y R-4 en los lepidópteros de la Reserva Natural “El Regajal-Mar de Ontígola””.

Vémonos na Escola compañeiros!