Un ano máis, contaremos coa colaboración dos nosos compañeiros David Dopereiro e Ismael Espasandín, que compartirán con nós o seu traballo no estudo e conservación da herpetofauna no concello da Coruña. A actividade estará centrada na Vipera seoanei, unha especie moi representativa dos nosos ecosistemas que, a pesar do seu papel ecolóxico, continúa sendo pouco coñecida e frecuentemente malinterpretada.

A xornada desenvolverase o sábado, 9 de maio de 2026, de 9:45 a 13:30 h, e consistirá nunha saída interpretativa pola contorna de Feáns, A Coruña. Durante o percorrido, teremos a oportunidade de coñecer de primeira man as metodoloxías de seguimento que empregan David e Ismael, así como achegarnos ao seu traballo de campo.

Ademais, a actividade servirá tamén para poñer en valor a biodiversidade ligada ás prácticas agrarias tradicionais que aínda se conservan na periferia do municipio, auténticos refuxios para numerosas especies silvestres.

Unha ocasión moi especial para achegarse ao mundo da herpetoloxía e reflexionar sobre a importancia de conservar tanto as especies como os hábitats que as sosteñen.

Tes ata o venres, 8 de maio do 2026, ás 14h para inscribirte!!

Este curso ten un custo de:

• Socios/as G.N. Hábitat:
  • Nenos (menores de 14 anos): 5€
  • Maiores de 14 anos: 8€

• Non Socios/as G.N. Hábitat:
  • Nenos (menores de 14 anos): 8€
  • Maiores de 14 anos: 15€

O importe recadado coa inscrición nestas actividades destinarase ao proxecto de estudo da poboación de víboras de Feáns. Agradecemos moito a túa colaboración e apoio nesta iniciativa de conservación.

Lembramos que para participar é imprescindible realizar a inscrición previa e formalizar o pago dentro do prazo establecido. Non se permitirá a asistencia de persoas que non estean inscritas ou que non teñan completado o proceso de pago en tempo e forma.

Todas as persoas participantes estarán cubertas cun seguro de accidentes e responsabilidade civil durante o desenvolvemento da actividade. Ademais, recibirán toda a información necesaria e as recomendacións oportunas para garantir unha experiencia segura e satisfactoria.

Pregamos compromiso e responsabilidade á hora de asistir. No caso de non poder participar tras confirmar a túa praza, agradeceriamos que nos informaras canto antes. Deste xeito, poderemos ofrecer esa praza a outra persoa interesada e contribuír a que máis xente poida desfrutar da xornada.

Dúbidas e comentarios en inscricion@gnhabitat.org│981 135 014

Anímate e ven connosco!