Continuamos ca VII promoción de Escola de Naturalistas. Este terceiro bloque estará dedicado á mastozooloxía, coa charla “Introdución á mastozooloxía” e a súa correspondente saída de campo. Afondaremos no esquivo mundo dos mamíferos, aprenderemos a diferenciar e recoñecer as especies mais representativas, coñeceremos os recursos necesarios para iniciarse neste eido e familiarizarémonos coas  técnicas de estudo e o recoñecemento de indicios no medio natural.

Este bloque de contidos virá impartido polos compañeiros:

Andrés Pereira:

Biólogo e naturalista. Centrou as súas investigacións neste grupo faunístico analizando as poboacións de mamíferos semiacuáticos (lontra –Lutra lutra– e rata de auga –Arvicola sapidus-) no Parque Natural de Arribes del Duero, grazas ao cal adquiriu o Diploma de Estudos Avanzados e a súa Suficiencia Investigadora nos estudos de Doutorado.

Alfredo López:

Doutor en Bioloxía mariña, ilustrador científico e fundador da CEMMA (Coordinadora para o Estudo dos Mamíferos Mariños), presidente entre os anos 1992-2011. Actualmente é becario post-doutoral da Universidade de Aveiro-CESAM.

Manu Cernadas:

Informático de profesión e naturalista de vocación, implicouse activamente no Grupo axudando na optimización dos procesos e técnicas desenvolvidas por G.N.Hábitat nos seus estudos. Colabora na xestión e posta en marcha dos proxectos de fototrampeo, grazas ao cal adquiriu un gran coñecemento desta técnica e das súas aplicacións no eido da mastozooloxía.

Vémonos na Escola compañeiros!