A paisaxe rural galega sempre estivo chea de sebes vivas: liñas de árbores e arbustos que delimitaban as fincas, protexían os cultivos e ofrecían refuxio á fauna. Eran o corazón do bocage ou mosaico agrícola galego, unha forma de organizar o territorio que combinaba produción, beleza e equilibrio coa natureza.

Co paso dos anos, moitas desas sebes desapareceron. Por iso, no outono 2025 estase a desenvolver a iniciativa A Liga das Sebes como parte da acción piloto Green InfrasTREEcture for the Landscape, promovida polo Instituto de Estudos do Territorio dentro do proxecto GIFT – Green Infrastructure for Forest and Trees, dirixido a mellorar a infraestrutura verde en Europa.

A Liga das Sebes pretende volver poñer en valor e recuperar as sebes autóctonas -esa rede natural que tanto lle deu á nosa terra-, coa participación dos titulares de parcelas agrícolas na Zona de Concentración Parcelaria (ZCP) de Fisteus, en Curtis.

Neste proxecto, financiado con fondos europeos Interreg,  colaboran  tamén o Servizo de Infraestruturas Agrarias da Consellería de Medio Rural, o Concello de Curtis e unha chea de entidades de ámbito local como os centros escolares ou as asociacións de veciños de Curtis.

Nos vindeiros meses levaranse a cabo distintas actividades (faladoiros, encontros veciñais, obradoiros de plantación…) das que iremos informando na nosa páxina web e redes sociais.

📚 Convocatoria

O Diario Oficial de Galicia publicou o 26-11-2025 a Resolución do 19 de novembro de 2025, que establece as bases da convocatoria pública para participar na iniciativa A Liga das Sebes na zona de concentración/reestruturación parcelaria de Fisteus (Curtis). AnuncioG0192-201125-0001

Quen pode inscribirse?

• Persoas titulares de predios de substitución con superficie agraria útil na ZCP de Fisteus.
• As fincas deben limitar cun camiño.
• A participación é voluntaria e sen custo para as persoas propietarias.

Como facelo?

A inscrición hai que realizala a través do formulario oficial dispoñible na plataforma da Xunta de Galicia Apunta

O prazo rematou o 15 de decembro de 2025.

Desde G.N. Hábitat animamos a toda a veciñanza de Fisteus a informarse, participar e formar parte deste proxecto colectivo que busca devolverlle vida ás marxes das fincas e á paisaxe agraria galega.

Para máis información sobre o proxecto, contacta connosco.

📚 Proximas actividades

Proximamente organizaremos máis actividades informativas e divulgativas sobre A Liga das Sebes, que iremos anunciando a medida que se confirmen. Velaquí o calendario provisional:

📚 Materiais divulgativos