O Grupo Naturalista Hábitat dá por rematado o proxecto «Estudo e divulgación do medio mariño e costeiro no GALP GA Sur 2025», máis coñecido como «Coñece o teu litoral», unha iniciativa orientada ao coñecemento, á conservación e á posta en valor do litoral do Golfo Ártabro Sur, que combinou o seguimento ambiental, as actuacións de conservación e a divulgación e sensibilización cidadá.

Ao longo de 2026, o proxecto permitiu avanzar na detección de especies exóticas invasoras, promover a recuperación de espazos costeiros e achegar a biodiversidade mariña á cidadanía mediante actividades participativas, saídas de campo e recursos divulgativos.

Avaliación e conservación do medio costeiro

Coñecer a distribución das especies invasoras

Unha das principais liñas de traballo foi a avaliación ambiental do litoral. Realizáronse 60 xornadas técnicas de campo para a detección e cartografía de especies exóticas invasoras, centradas na procura de 66 especies obxectivo. Este labor contribúe a mellorar o coñecemento da súa distribución e a dispoñer de información útil para orientar futuras actuacións de xestión e control.

Recuperar os hábitats costeiros

O proxecto tamén promoveu a conservación activa dos ecosistemas costeiros mediante a participación cidadá. Desenvolvéronse 10 actividades de retirada de flora exótica invasora, con actuacións en espazos dunares de Santa Cristina (Oleiros) e Alba (Arteixo). Nestas xornadas colaboraron persoas voluntarias e grupos de rapazada, favorecendo a implicación social na recuperación dos hábitats naturais.

Actuar fronte ao lixo mariño

A estas intervencións sumáronse 12 actividades de retirada de residuos en praias e espazos costeiros, realizadas en distintos puntos do territorio. Estas accións contribuíron á mellora ambiental dos areais e permitiron traballar coa cidadanía sobre a problemática do lixo mariño, as súas consecuencias para a biodiversidade e a importancia de reducir a xeración de residuos.

Divulgación e participación cidadá

A divulgación foi outra das liñas fundamentais do proxecto, cun total de 25 actividades dirixidas ao público, distribuídas en diferentes formatos:

O programa incluíu actividades con centros educativos, colectivos sociais, persoas voluntarias e público xeral, facilitando diferentes vías de participación e promovendo unha relación máis próxima e responsable coa contorna mariña.

Un proxecto co apoio da Unión Europea

O proxecto enmárcase na Estratexia de Desenvolvemento Local Participativo do GALP Golfo Ártabro Sur, e conta co financiamento da Unión Europea, que contribuíu co 70 % a través do programa FEMPA, e da Xunta de Galicia, co 30 % restante. Este apoio resulta fundamental para desenvolver actuacións de seguimento ambiental, conservación dos hábitats costeiros e divulgación da biodiversidade mariña, así como para fomentar a participación cidadá na protección dos recursos naturais do territorio.

Con este proxecto, GN Hábitat reafirma o seu compromiso coa conservación do medio mariño e costeiro, combinando o traballo técnico coa intervención ambiental e a educación, e contribuíndo a que a cidadanía coñeza, valore e participe activamente no coidado do litoral.