Temos a satisfacción de anunciar que o Grupo Naturalista Hábitat resultou beneficiario dunha nova subvención para desenvolver o proxecto “Estudo e divulgación do medio mariño e costeiro no GALP GA Sur 2025”.

Marco e financiamento

Este apoio chega da man da Orde do 12 de febreiro de 2025, no marco da Estratexia de Desenvolvemento Local Participativo (EDLP) do GALP Golfo Ártabro Sur. O proxecto está cofinanciado polo Fondo Europeo Marítimo e da Pesca (FEMP) da Unión Europea (70 %) e pola Xunta de Galicia (30 %), cunha contía total de 50.103,49 €, o 100 % do custo subvencionable.

Ligazón oficial do proxecto

 

Obxectivos do proxecto

  • Avaliar e monitorizar a presenza de flora exótica invasora no litoral do Golfo Ártabro Sur.
  • Fomentar a recuperación ambiental e a conservación do litoral.
  • Promover o coñecemento, a sensibilización e a participación cidadá.
  • Contribuír á valorización dos recursos mariños e pesqueiros locais.

Actuacións previstas

As accións desenvolveranse no litoral dos concellos do ámbito do GALP Golfo Ártabro Sur e estruturaranse nas seguintes liñas:

  • Detección e cartografía das especies exóticas invasoras.
  • Retirada manual de flora invasora con participación de voluntariado.
  • Campañas de recollida de residuos en espazos naturais costeiros.
  • Faladoiros divulgativos dirixidos a centros educativos, confrarías, colectivos e veciñanza.
  • Rutas terrestres e mariñas para conectar á poboación co medio natural que a rodea.
Con este proxecto consolidamos o noso compromiso coa conservación do medio mariño e costeiro e coa participación cidadá.
Seguiremos informando dos avances e convidámosvos a participar nas actividades que se organizarán nos vindeiros meses.Permanecede atent@s!