Este venres 26 de setembro, ás 20:30h, o espazo Rosalía Mera, situado na parroquia de Dorneda, entre a Rúa do Mar e a Rúa da Poza (ver localización no mapa), converterase en escenario da estrea do documental “Con outra ollada”: unha peza audiovisual que pon en valor este espazo verde singular, consolidado como referente de deseño sostible e respecto pola biodiversidade.

A proxección terá lugar ao aire libre, no propio parque, reforzando así a mensaxe do filme: a integración da natureza na vida cotiá da cidadanía de forma respectuosa, transformadora e inclusiva. A entrada será libre ata completar aforo (non se require inscrición previa), e en caso de choiva ou condicións meteorolóxicas adversas, o evento adiarase. 

O documental recolle o proceso de creación do proxecto a través de imaxes e entrevistas coa veciñanza, especialistas e membros do equipo técnico, amosando como este proxecto naceu dende unha perspectiva colaborativa, social e ambiental. Un dos aspectos máis singulares é que o proxecto se materializou sobre un solo de titularidade privada de clasificación urbana, co firme compromiso da promotora de destinalo a uso público para o desfrute da veciñanza, nunha contorna de presión urbanística.

No proceso de re-pensar un novo uso e o deseño para este espazo natural, así como na execución da obra, participamos activamente a empresa de paisaxismo Orza Paisajismo, o Grupo Naturalista Hábitat e a empresa de economía social Trébore Jardinería, con destacadas colaboracións de empresas locais, artesáns,  artistas e o propio Concello de Oleiros.

A proxección contará coa participación de membros do equipo técnico e representantes do Concello, que compartirán a súa experiencia e visión sobre este proxecto que redefine o concepto de espazo público urbano e promove unha nova ollada sobre a relación entre urbanismo e natureza.

Novas relacionadas na nosa web ⬇

Agardámoste!