Xa sabedes que os parques eólicos preocúpannos, levamos tempo falando na radio, apoiando alegacións e traballando no posicionamento do grupo fronte a esta aparición masiva.

Desta volta vimos de amosar o noso apoio ao Manifesto por un novo modelo de desenvolvemento eólico para Galiza, na que máis de 130 entidades e colectivos galegos advertimos das graves deficiencias que presenta o actual modelo.

En breve poderemos darvos a coñecer o noso posicionamento oficial ao respecto disto e doutros temas de interés xeral. Pero mentres tanto, comunicámosvos o apoio/adhesión institucional do  G. N. Hábitat á Marcha contra a invasión eólica, convocada para este sábado 5 de xuño día do medio ambiente.

As plataformas e colectivos que asinamos este manifesto estamos a favor das enerxías renovábeis, pero sempre que sexan sustentábeis e non á costa da destrución do medio ambiente.

A marcha sairá ás 12 horas desde a Alameda (Santiago de Compostela) e seguirá o seguinte percorrido: Rúa da Senra, Praza de Galiza, Rúa Doutor Teixeiro, Rúa República do Salvador, Rúa Hórreo, Rúa das Orfas, Cantón do Toural, Rúa do Vilar, Rúa Xelmírez, Rúa de Fonseca, Rúa do Franco, ata chegar á Praza do Obradoiro.

O remate do percorrido terá lugar ao pé da Catedral de Santiago onde se lerá o manifesto “Eólica, Así Non” por voceir@s de colectivos que representan as ducias de plataformas sociais ou veciñais de toda Galiza especialmente afectadas pola actual invasión eólica.

IMPORTANTE: A día de hoxe preocúpannos as grandes concentracións e por iso, co ánimo de cumprir coas necesarias medidas de seguridade e o adecuado discorrer da marcha, esta contará cun servizo de orde. Se vas participar, por favor que sexa con responsabilidade, garda a distancia de seguridade e leva sempre posta a máscara de protección.