Continuamos coas actividades do proxecto “Vixías dos nosos ríos”, cun obradoiro de avaliación do estado ecolóxico do rio Grande de Xubia en Narón o martes 15 de outubro.

Contaremos cos alumnos de 1º de bacharelato do IES Canido, de Ferrol, que poderán poñer en práctica no campo o aprendido nas charlas impartidas nese centro educativo a principios de outubro.

Para iso, terán que recoller e identificar os macroinvertebrados que viven no rio, medir diversos parámetros físicos e químicos nas augas, e examinar a calidade do bosque de ribeira analizando a vexetación. Finalmente, poderán poñerlle unha nota ao estado de conservación do rio Xubia baseándose nos datos obtidos.

Esta actividade encádrase no programa de actividades de “Vixías dos nosos ríos”, un proxecto do Grupo Naturalista Hábitat subvencionado por Augas de Galicia.

Dúbidas e comentarios en vixiasrios@gnhabitat.org│639 13 16 88