O próximo domingo, 2 de xuño do 2024, teremos un Curso sobre plantas medicinais que tiñamos moitas ganas de que se levase a cabo. Este curso estará a cargo de María Moure De Oteyza, tamén coñecida como María das Herbas, grazas ao seu libro publicado no 2020 e baixo o título “María das herbas e as Herbaxeiras do Caurel”. No seu libro recolle o saber dos usos medicinais da terra do Courel. María Moure é licenciada en Farmacia pola USC e gran coñecedora dos usos das herbas, especialmente da Etnomedicina na Serra de O Caurel (Lugo). 

A actividade será o domingo, 2 de xuño do 2024, e constará dunha charla de 10:30 a 14h co título “Uso tradicional das plantas medicinais en Galicia: o exemplo do Caurel” na Sede da Reserva de Biosfera Mariñas Coruñesas e Terras do Mandeo (MCeTM), e dunha saída para o recoñecemento das plantas nun espazo natural de 16:30 a 19:30h en Chelo (Coirós), na beira do río Mandeo, zona protexida dentro da Reserva de Biosfera MCeTM. 

Está dirixido a estudantes e naturalistas entusiastas maiores de 18 anos. Así e todo, para a participación é imprescindible a reserva de praza (inscrición previa) a través do formulario habilitado. As prazas son limitadas. Ao rematar o taller entregarase un certificado de asistencia e aproveitamento co número de horas prácticas recibidas. Seguirase unha rigorosa orde de inscrición ata completar o máximo de participación. 

Tes ata o sábado, 1 de xuño do 2024, ás 18h para inscribirte!!

Este curso ten un custo de:

• Socios/as G.N. Hábitat: 20 €

• Adultos/as (maiores de 18 anos): 30 €

O noso agradecemento á Reserva de Biosfera Mariñas Coruñesas e Terras do Mandeo pola cesión da Sede para a charla.

Non perdades esta oportunidade!! Anímate a aprender moito das nosas plantas medicinais!!